National Politics

શંકરસિંહ બાપુનો આક્ષેપ, ગોધરાકાંડની માફક પુલવામા અટેક પણ કાવતરું હતો.

મોર્નિંગ ન્યુઝ ફોક્સ નેટવર્ક : અમદાવાદમાં આવેલા એનસીપીના કાર્યાલયમાં એક પ્રેસ કોન્ફરન્સને સંબોધતા શંકરસિંહે આક્ષેપ કર્યો હતો કે સીઆરપીએફના 40 જવાનો જેમાં શહીદ થયો તે કાશ્મીરનો પુલવામા અટેક ભાજપનું કાવતરું હતું. બાપુએ દાવો કર્યો હતો કે, તેમને કોઈએ જણાવ્યું હતું કે પુલવામા અટેકમાં આરડીએક્સ ભરેલી જે ગાડીનો ઉપયોગ થયો હતો તે ગુજરાત પાર્સિન્ગની હતી.

ભાજપ સરકાર આતંકવાદનો ઉપયોગ ચૂંટણી જીતવા માટે કરી રહી હોવાનો આક્ષેપ પણ શંકરસિંહે કર્યો હતો. તેમણે પુલવામા અટેક બાદ એરફોર્સ દ્વારા કરાયેલી બાલાકોટ એર સ્ટ્રાઈક પર પણ શંકા વ્યક્ત કરતા કહ્યું હતું કે, આ હુમલામાં કોઈ આતંકવાદીનું મોત નથી થયું. કોઈ ઈન્ટરનેશનલ ન્યૂઝ એજન્સીએ પણ બાલાકોમાં 200 આતંકવાદીઓ માર્યા ગયાની વાતને સમર્થન નથી આપ્યું. બાલાકોટ એરસ્ટ્રાઈક પણ એક પહેલાથી નિર્ધારિત કાવતરું હતું.

પુલવામા અટેક પહેલા ગુપ્તચર સંસ્થાઓએ આપેલા ઈનપુટને કેમ અવગણવામાં આવ્યા તેવો સવાલ પણ વાઘેલાએ ઉઠાવ્યો હતો. તેમણે કહ્યું હતું કે, ઈનપુટ હોવા છતાં કોઈ આગોતરાં પગલાં લેવામાં નહોતા આવ્યા. જો બાલાકોટ વિશે સરકાર પાસે માહિતી હતી તો પછી આતંકી કેમ્પો વિરુદ્ધ કાર્યવાહી કેમ ન કરાઈ? પુલવામા જેવા હુમલાની રાહ કેમ જોવામાં આવી?