Gujarat

સૌરાષ્ટ્રના વાતાવરણમાં પલટો , ગાજવીજ અને કરા સાથે ક્યા વિસ્તારોમાં પડ્યો વરસાદ? જુઓ વિડીયો

મોર્નિંગ ન્યુઝ ફોક્સ નેટવર્ક : ગુજરાતમાં છેલ્લા થોડાક દિવસ સુધી વાતાવરણ બદલાયું છે  જેમાં  ઘણીવાર કેટલાક વિસ્તારોમાં  ધીમે ધીમે આંધી આવતી હોય છે  તો ક્યાંક વાદળછાયુ વાતાવરણ હોય છે  તો વળી ક્યાંક ગરમીનો ઉકળાટ જોવા મળી રહ્યો છે ત્યારે આજે વહેલી સવારે સૌરાષ્ટ્રમાં આકાશ વાદળોથી ઘેરાયું હતું. બાદમાં બપોર બાદ વાતાવરણમાં પલ્ટો આવતા રાજુલા પંથકમાં કરા સાથે વરસાદ પડ્યો હતો. ભારે પવન અને ગાજવીજ સાથે તાલુકાના ડુંગર, માંડરડી, આગરીયા, વાવેરા સહિતના ગામોમાં વરસાદ પડ્યો હતો.

જો કે આ વરસાદને લઇને અમરેલી જિલ્લામાં ઉનાળુ પાક અને કેરીના પાકને નુકસાન જવાની ભીતિ સેવાઇ રહી છે.સાવરકુંડલા પંથકમાં પણ વરસાદી ઝાપટા પડયા હતા.ખાંભા પંથકમાં પણ અચાનક જ કાળા ડિબાંગ વાદળો છવાયા હતા અને ગાજવીજ સાથે ઝરમર વરસાદ વરસ્યો હતો. સાંવરકુંડલાના વીજપડી, ભમ્મર, ધાડલા અને ચીખલીમાં વીજળીના કડાકા ભડાકા સાથે વરસાદ વરસ્યો હતો. વરસાદથી અસહ્ય ગરમીમાંથી લોકોને રાહત મળતા ઠંડક પ્રસરી ગઇ હતી. વરસાદથી રસ્તા પર પાણી ફરી વળ્યા હતા. રાજુલાના વાવેરા ગામે ભારે પવનને કારણે અનેક વૃક્ષો ધરાશાયી થયા હતા. રાજુલાના અનેક ગામોમાં ધોધમાર વરસાદ વરસતા ખેતરોમાં પાણી ભરાઇ ગયા હતા.